ഇ- മാലിന്യ വിമുക്ത പദ്ധതിയോട് മലയോര ജില്ലയായ ഇടുക്കിയും മുഖം തിരിക്കുന്നതായി റിപ്പോര്‍ട്ടുകള്‍

തൊടുപുഴ: ഇ- മാലിന്യ വിമുക്ത പദ്ധതിയോട് മലയോര ജില്ലയായ ഇടുക്കിയും മുഖം തിരിക്കുന്നതായി റിപ്പോര്‍ട്ടുകള്‍. വീടുകള്‍ സ്ഥാപനങ്ങള്‍ എന്നിവിടങ്ങളില്‍ നിന്നായിയി ഇ- മാലിന്യങ്ങള്‍ ശേഖരിക്കുന്ന പദ്ധതി ജൂലൈ 15നാണ് സംസ്ഥാനത്ത് തുടക്കമായത്. പദ്ധതി പ്രവര്‍ത്തനങ്ങള്‍ ആരംഭിച്ചത് മുതലുളള 57 ദിവസങ്ങളിലായി ജില്ലയില്‍ 890 കിലോ ഇ- മാലിന്യങ്ങളാണ് സംഭരിച്ചത്. സംസ്ഥാനത്തെ മറ്റ് ജില്ലകളെ അപേക്ഷിച്ച് വയനാട് ജില്ലയും ഇ- മാലിന്യ ശേഖരണത്തില്‍ പിന്നിലാണ്. ഇവിടെ 525 കിലോ മാത്രമാണ് ശേഖരണം നടന്നത്. തദ്ദേശ സ്വയംഭരണ സ്ഥാപനങ്ങളില്‍ പ്രവര്‍ത്തിക്കുന്ന ഹരിത കര്‍മ്മ സേനയുടെ നേതൃത്വത്തിലാണ് പദ്ധതി പ്രകാരം ഇ- മാലിന്യങ്ങളുടെ ശേഖരണം. ഇവര്‍ ശേഖരിക്കുന്ന ഇ- മാലിന്യങ്ങള്‍ ക്ലീന്‍ കേരള കമ്പനിക്കാണ് കൈമാറുന്നത്. ഇത്തരം വസ്തുക്കള്‍ സംസ്‌ക്കരിച്ച് പുനചംക്രമണത്തിലൂടെ വിവിധ തരത്തിലുളള വസ്തുക്കളുടെ നിര്‍മ്മാണത്തിനായി ഉപയോഗിക്കും. ഇ- മാലിന്യങ്ങളും ജൈവ -അജൈവ മാലിന്യങ്ങളും ഹരിത കര്‍മ്മ സേനകള്‍ക്ക് കൈമാറണമെന്ന് സര്‍ക്കാര്‍ ആവര്‍ത്തിച്ച് നിര്‍ദ്ദേശങ്ങള്‍ നല്‍കിയിട്ടും ജില്ലയുടെ വിവിധ മേഖലകളില്‍ ഇപ്പോഴും സഹകരിക്കാത്ത ആളുകളുണ്ടെന്ന് പറയുന്നു. ഹൈറേഞ്ച്- ലോറേഞ്ച് വ്യത്യാസങ്ങളില്ലാതെ ഇപ്പോഴും ജില്ലടുടെ ചില മേഖലകളില്‍ ആളുകള്‍ പാതയോരങ്ങളിലേക്ക് വിവിധ തരത്തിലുളള മാലിന്യങ്ങള്‍ തളളുന്ന പ്രവണതകളുണ്ട്. വിവിധ തദ്ദേശ സസ്ഥാനപങ്ങളുടെ നേതൃത്വത്തില്‍ ഇത്തരക്കാരെ കണ്ടെത്തി പിഴ ഉള്‍പ്പെടെയുള്ള നിയമ നടപടികളും സ്വീകരിക്കുന്നുമുണ്ട്. മാലിന്യങ്ങള്‍ തള്ളല്‍ വ്യാപകമായതിനെ തുടര്‍ന്ന് തദ്ദേശ സ്ഥാപനങ്ങള്‍ വ്യാപാരികള്‍ റസിഡന്‍സ് അസോയിയേഷനുകള്‍ എന്നിവ സ്വന്തമായി സി.സി.റ്റി.വി ക്യാമറകളും സ്ഥാപിച്ചിട്ടുണ്ട്. സംസ്ഥാനത്ത് ഏറ്റവും കൂടുതല്‍ മാലിന്യം ശേഖരിച്ച ജില്ല ആലപ്പുഴയാണ്. ഒന്നര മാസം കൊണ്ട് 15936.34 കിലോ ഇ – മാലിന്യങ്ങളാണ് ഇവിടെ സംഭരിച്ചത്. തിരുവനന്തപുരം 6420 കിലോ, കൊല്ലം 1596.19, കോട്ടയം 7939.62, എറണാകുളം 15682.08, തൃശൂര്‍ 3218, പാലക്കാട് 2225.54, മലപ്പുറം 2888.9, കോഴിക്കോട് 6260, കണ്ണൂര്‍ 3838, വയനാട് 525, കാസര്‍കോട് 1654 എന്നിങ്ങനെയാണ് മറ്റ് ജില്ലകളില്‍ സംഭരിച്ചത്. 43 ഇനം ഇ -മാലിന്യങ്ങളാണ് പ്രധാനമായും വില നല്‍കി ശേഖരിക്കുന്നത്. ഒരു കിലോയ്ക്ക് പഴയ റഫ്രിജിറേറ്ററിന് 16രൂപ, ലാപ്‌ടോ പ് 104, എല്‍.സി.ഡി – എല്‍.ഇ.ഡി ടി.വി 16, ടോപ്ലോഡ് വാഷിങ്‌മെഷീന്‍ 16, ഫ്രണ്ടാഡ് 9, സീലിംഗ് ഫാന്‍ 41, മൊബൈല്‍ ഫോണ്‍ 115, സ്വിച്ച് ബോര്‍ഡ്17, എയര്‍ കണ്ടീഷണര്‍ 58 എന്നിങ്ങനെയാണ് വില നിലവാരം. ആപത്കരമായ മാലിന്യങ്ങളായ ഫ്‌ളൂറസന്റ് ട്യൂബുകള്‍, സി.എഫ്.എല്‍ ബള്‍ബുകള്‍, ഫ്‌ലോപ്പി ഡിസ്‌കുകള്‍ എന്നിവയും ശേഖരിക്കുന്നുണ്ട്.